Présentation
Centre de Ressources
Toponymie
Calendrier
Visites

 455315 visiteurs

 11 visiteurs en ligne

 
Dictaa Occitana vèrs Anonai

Dictada.png
Per la region Ròse-Aups la dictaa occitana se fai dempuèi d'ans quora en Droma, quora en Ardecha. L'an passat èran vèrs Nions, e aqueste an nos acamperam vèrs Anonai, la pus bèla vila d'Ardecha, franc a las bolas septentrionalas de la lenga occitana (que lo francoprovençau comença dins lo canton vesin de Serrièras).

Aquela manifestacion a l'entorn de l'escritura de nòstra lenga es l'ocasion de noar de contactes entre los amoroses de l'occitan per una practica conviviala e e de se mostrar publicament en convidant la premsa a l'eveniment un pauc estonant que constituís l'utilizacion de l'occitan en situacion de normalitat. Foguèt tornarmai una excellenta jornaa per lo cinquantenat de personas presentas vèrs Nonai.

Au mèi d'aquela vila de tradicion obrèira que coneis de fòrtas dificultats economicas, una bandeiròla a l'entraa de l'avengua d'Euròpa ont se fasiá la dictaa marcava la luta en cors còntra la darrèira vaga de licenciaments que tòcha lo bacin d'Anonai.

Sem ben luènh aquí d'un cèrte imatge de ruralitat cevenòla que pòt evocar per d'aucuns lo nom d'Ardecha, mas es aquí que l'associacion Parlarem en Vivarés qu'organizava quela manifestacion panoccitana en collaboracion aube l'IEO portèt un còp de mai la pròva que la lenga tradicionala es una part viva de la cultura populara dau naut Vivarés.

Dins los locaus dau GOLA (Gropament de las Òbras Laïcas d'Anonai) avián chausit lo tèxte d'un curat, "Coma vendèro la Lauveta" que l'autor n'es lo Joannès Dufaut, cerchaire e lexicograf dels parlars dau nòrd.

Lo matin, dau temps que s'acampava l'AG de l'IEO RA, foguèt prepausat un obraor de presentacion de l'escritura de la lenga occitana als coratjoses e als curioses.

La dictaa foguèt legia en estereofonia dins la pronóncia dau país amai dins una pronóncia pus meijornala per aidar aqueus qu'èran pas dau caire bien conéisser los mots davant que de los escriure.

Puèi dau temps que los correctors corregián, e davans que d'estrenar totes los participants (amb de libres, de CD e… un abonament a La Setmana !), los chantaires e contaires de la corala de Parlarem en Vivarés nos regalèron de lor interpretacion de chançons tradicionalas e de scenetas de l'umor impecablament mestreat.

<Rendut-còmpte de Denis Capian>

Date de création : 02/07/2011 : 17:09
Dernière modification : 01/08/2011 : 21:52
Catégorie : Centre de Ressources - La Dictada Occitana
Page lue 5607 fois
Précédent  
  Suivant

Pòrta d'Òc
Recherche
Recherche