Presentacion
 ↑  
Centra de Ressorgas
Toponimia
Calendièr
Visitas

 457289 visitaires

 10 visitaires en linha

L'ensems daus parlars istoriques de Droma se restachan a doas lengas romanicas : l'occitan e lo francoprovençau.

L'occitan cuèbre gaireben l'ensems de Droma. En occitan, se passa insensiblament d'una granda zòna dialectala a una autra. Es quasiment impossible de traçar de boinas netas, alevat benlèu si prenèm en consideracion pas qu'un critèri solet (exemple : la boina ca = sud occitan / cha = nòrd occitan, cantar au sud, chantar au nòrd). Amai dins aquela situacion, se pòt trovar d'endrechs onte las doas formas coexistan. L'occitan de Droma aparten principalament au dialècte vivaroaupenc, que s'esbandís de Vivarés, de Sinjau e de Sant Bonet dau Chastel au ponent entrò a las Aupas italianas au levant, en passant per Droma. Lo vivaroaupenc se devesís en dos sosdialèctes:
  • Lo vivarodaufinenc, que cuèbre l'ensems de Droma e lo nòrd de Vivarés, tant coma las regions de Sinjau (Léger-Naut) e de Sant-Bonnet dau Chastel (Léger).
  • L'aupenc, que cuèbre mai que mai las Aupas dau Sud (en França e en Italiá) e que frusteia l'est de Droma.

Lo francoprovençau
cuèbre mai o mens la mitat nòrd de Droma de las Còlas. Los parlars occitans de la region de Romans d'Isèra (Tornon, Tenh e entrò a Sant-Donat) coneisson de trachs de transicion vès lo francoprovençau, mai restan pasmens occitans.

L'occitan de Sud de Droma fai la transicion entre lo dialècte vivaroaupenc e lo dialècte provençau.

 
Se prenèm en consideracion la preséncia de las doas caracteristicas grandas dau vivaroaupenc (son ancianas que non sai e existavan dejà a l'Atge Meian) :
  • chaüta de las intervocalicas
  • e promeira persona dau singulier en o,
 
povèm ensaiar d'avançar que, en Droma, lo vivaroaupenc comença veraiament un pauc au nòrd de Montelaimar (vès Sauset, Clèu d'Andran e en Ardecha au nòrd de l'Eirieu.) Dins los dos departaments, se tròva la promeira caracteristica (chaüta de las intervocalicas) mai au sud : en Droma entrò a Nions e las Baroniás, un pauc mens au sud dins la valèia de Ròse, e en Ardecha dins lo Vivarés meian entre Eirieu e una linha (pas drecha) que vai de Mezenc au Telh en passant per Mezilhac e lo Ròc de Gordon.


Data de creacion : 02/07/2011 : 16:07
Darriera modificacion : 11/08/2011 : 16:29
Categoria : Presentacion - L'espaci occitan
Pagina legida 7812 còps

Pòrta d'Òc
Rechèrcha
Rechèrcha